De Jeschichte von's Schwein Drucken
Geschrieben von: Peter, Frank   
Mittwoch, den 25. Januar 2012 um 19:38 Uhr

Jürgen Schönfeld

De Jeschichte von’s Schwein


Ich hawwe hier ma anne Jeschichte offjeschrimm, die sich bei uns ins Dorf, in Tertn, jenauso zujetraren hamm soll.

 

 


Wir denken uns ma ann par Jahre zuricke, so in de fuffzer Jahre von’s vorichte Jahrhunnert. Da saks noch nich so schlaraffenlandartich mit de Fleesch- unn Wurschtvorsorjunk aus, wie das heite so iss. In ann Fleescherlan kunnte mor sich in Ruhe de scheen Kacheln an de Wand  ankuken, weil die nich so wie heite von ville Wurscht, Schpeck unn Schinken vordeckt warn.
De Leite damals hotten alle das Buschträm, nämbei ihrn Speiseplan so ann bisschen off Trapp zubringn unn och Keller un Kiche nich so leere ausähn zu laasen. Das heeßt och an de Feiertare unn so bei buschtimmte Anlässe ma was richjes offn Tisch zubringn.
Alle hotten se Hinner, wäjen de Eier unn na finf Jahre wenn se da nich mehr so richtich läjen taten, wurrnse jeschlachtet. Nach ann par Schtunn weech kochen machte mor auses Fleesch scheenes Frikassee unn aus de Knochen, Briehe vor de Nudelsuppe.
De meesten hotten außer ihre Hinner noch Karnickel, Enten unn Jense, manche och noch Zikken.
Ann par Leite konnten sich ann Schwein haaln. Die wahrn jut dran, weil se ann Schtikke Acker nembei hotten oder ann jeroßen Jarten.
Manche hotten nischt von beeden, awwer jute Beziehungn oder jeroße Säcke, ann Fahrrad mittn jeroßen Jepäckträjer oder eenfach Acker von de LPje in de nähere Umjäwunk wo denn de Futterjrundlare sowiso jejähm war.
Ich marke schon ich bin ann bisschen von de ejentliche Jeschichte abjekomm, awwer ma muß je de Vorjeschichte och ma mit beleichten.
Jetzt willer zu unse Jeschichte von’s Schwein zurick.
An een Tach in Winter saß de Famielje, ich jäwe se jetzt ma ann Nahm, Sausewind, bei’s Ahmbrot heeme an Kichentisch.
Dor Vater meente, off de Bemme jetzt anne richtje hausjeschlachtete Wurscht wäre jarnich so iwel. Immer die olle Jachtwurscht von Konsum, ich weeß nich, lanksam reechts och ma.
(Er hotte off de Arweet von Elzens Fritze anne jute Hausschlachteläwerwurschtbemme jejessen.)
Heert mich jetzt ma zu, wir hamm doch da draußen so ann scheen Schtall. Wenn mor dän ann bisschen uffreim wirrn un ann Schwein rinschtelln täten, wäre das nich anne jute Leesung?
De Kinner, zwee warn‘s, warn janz aus Heischen unn jelei invorschtann. De Mutter meente, na ja. Also wurre ruckartich beschlossen, es wird ins Friejahr ann kleenes Schwein anjeschafft, damit mor ins nächste Jahr ooch anne richtje Wurscht in de Schpeisekammer unn offn Teller hotte. De janze Famielje dachte nur noch ans Wellfleesch, de Schwartenwurscht, Läwerwurscht unn den janzen annern jereicherten Kram. Jetzt warn se sich alle eenich, das mit’s Schwein war ann juter Jedanke von Vater Sausewind.
Also wurre vor’s Frijahr bein Bauern Heinrich ann Ferkel buschtellt. De Sausewinds wollten’s awwer erscht hamm, wenn’s ann Leefer war, weil se sich mit de Kinnerschtuwwe von sonn Schwein nich so richtich auskannten.
Dor Bauer Heinrich hotte se nu off de Schweinewarteliste jesetzt unn frahte se nu noch, ob se sich das mit ann Schwein ooch richtich iwwerläht hamm.
Dor Wintor vorjink, unn’s Friejahr war ran.
Endlich nu, Karfreitach war’s soweit unn dor Leefer kunnte abjeholt wern.
Bein Bauern offn Hoff wurres kleene Tier in ann Kartoffelsack jeschteckt unn offen Handwarn jelan. De zwe Kinner treckten nu den Warn durchs Dorf heeme.
Unnerwechs awwer hotte sich dor Leefer vor lauter Angest durch’n Sack jefressen unn dor Vater musste das Vieh de Schnautze zuhaaln, damit’s nich abhaute. Es hotte ja och so firchterlich jeschrien, das kleene Tier.
Endlich warn se heeme anjekomm mit ihre Fuhre. Dor Vater hotte dän Kartoffelsack uffjeschnitten unn das kleene Wäsen wurre in de neie Behausunk jefiert. Warum sich’s jetzt noch streibte, es war ja nu endlich heeme. Dor Schtall hotte ann neien helln Anschtrich mit Karbittschlamm jekricht, offen Fußbonn laks Schtroh von letzte Ernte unn dor Troch war blitzeblank jescheiert.
De Kinner hotten och jelei ann Nahm vor’s Tier, es heeßt ab jetzt, Jonas.
Das kleene Tierchen war och janz lustich anzusähn, mit sein Ringelschwänzchen unn de vorschmitzten Oren. Jetzt war das kleene Tier in de Famielije uffjenomm.
Dän janzen Sommer iwwer wurres jehätschelt un vorweent von de beeden Kinner. Es krichte och richtich was zu fressen, denn jetzt kimmt die janze beese Wahrheet, es sollte nu ans Enne von sein kurzes Schweineläm, das heeßt so ann par Tare vor’s Heilije Fest zu Fleesch unn Wurscht vorarwetet wern.
Vater, Mutter unn och die beeden Kinner freiten sich wenn des Tier immer mehr zunahm unn so richtich rund und fett wurre. De Sau freite sich och iwwer alles wass’es vorjesetzt krichte unn fraß unn fraß.
Mittachsessensreste, jestoppelte jekochte Kartoffeln, Falläppel, Kohl unn de Schtrinke dorvon, manchma och Kleiesuppe oder och schon ma Brot unn Breetchen. Es wahr nich so eenfach das Tier immer so richtich satt zu kriejen. De Sausewinds hotten sich das mit’s Schweinefittern doch eenfacher vorjeschtellt. Jedenfalls alles was durch’s Tier jink setzte Fleesch unn Fett an unn dor janze Mist vorn Jarten war ja och nich zu vorachten.
Das arme Wäsen konntes ja nich wissen, dass es sich durch seine unjeweenliche Freßjier sein eejenes Jrab schaufelte oder anners jesacht den Ast absächte, wo’s droffsaß.
Das ehemals niedliche Schweinchen hotte jedenfalls so zum Schpätharbst schon scheene anjesetzt unn es kam de Zeit von de Ernte, de Fleeschernte nämlich.
Sausewinds mussten sich jetzt nu Jedanken machen, wie das Tier bei’s jeroße Schlachtefest in de Därme unn in de Bichsen komm sollte. De Zeit war lanksam ran jekomm.
Also wurre dor Fleescher buschtellt. Bei dän warn in Winter de Tarmine och mächtich knapp. Awwer er hotte noch ann frein Tach so kurz vor’s Heilije Fest, bloß weil bei de olle Frau Michaelis een Schwein an Rotloof vorschtorm war in de vorichte Woche, so janz pletzlich.
Was jetzt off eema alles off een zukimmt, meente dor Vater Sausewind zu seine Famielje, da hotte doch vorher jarkeener dran jedacht.
Dor Fleeschbeschauer musste zun Tarmin och noch injelan wern, weejen de Trichin nakuken.
Um Schlachteschein musste mor sich ja och noch bemien. Das jink nur bei’s Frollein Sens ins Rathaus von Tertn. Da jab’s jelei noch dorzu ann Bezuchsschein vor de zusätzlichen jesalzenen Därme, die denn in de BHje abjehohlt wern kennten.
Anne Offlare jab’s noch offn Wäk, nich vorjessen, Schweinedecke, Bauchschpeicheldriese unn de Hornschuk von’s Tier missen abjejem wern.
De Schweinedecke iss’es Fell off’s Kreitze von’s Tier. Awwer des weeß denn dor Fleescher schon selwer.
Als das de Sausewinds nu alles so hinner sich jebracht hotten, war noch das jeroße Probläm mit de Jewirze, da hotte nu jarkeener dran jedacht. Es sollte ja nich alles so nichtern schmecken, ann‘s Ende. Da brauchte mor doch Fefferkerner un Piment vor de Schlacke, Majoran, Kimmel unn och jemaln Feffer vor de Rot- unn Läwerwurscht. Salz war ja nu jarkeen Probläm, das jab‘s jenuch.
Mor kennte noch anne Läwer dorzukoofen, awwer mit de Jewirtze da mussten schon ma de Vorwanten von de annere Seite jebettelt wern, wäjens unnerschtitzen unn aushelfen.
Das Schlachtefest rikte immer weiter ran.
Mor sollte jetzt noch dazu saren, das Schwein sollte off seine letzten Tare seines kurzen Läms nich noch abhann komm, off deitsch jesacht, es sollte nich jeklaut wern. Jabs frieher effter schonn ma.
Zu der Zeit frieher wurrn mehr fette Schweine jeklaut als heite neie Autos. Wie jesacht, beese Leite jab’s schonn immer, och dazuma.
Dor Schtall von Sausewind’s Sau war jenfalls immer jut zujeschlossen unn obendrin noch vorrijelt. Dor Hund war ja och noch da, awwer mor kunnte sich offn Krepel nich so richtich vorlaasen. Um ann vormeintlichen Schweineentfierer in Ernstfall so annen Schreck inzujaren, war iwwer de Schtalltire immer ann Emmer jut jefillt mit anne Flissichket positioniert.
Das war de Erfindung von Vater Sausewind. Da hotte sich ma was richtijes infalln laasen.
Anne jeroße Jeloke hink och noch mit drann, um de Leite aus Bette zu holn, in Ernstfall.
Bei anne jewaltsame Effnunk miste dor Dieb jenfalls hart jetroffen wern.
De janze Anlare wurre ahms anjeschtellt unn in de Friehe willer entriejelt vor’s Offschließen von de Schtalltire. Bei de Sausewinds jink ähm de Sicherheet iwwer alles, bevor’s Schwein jeklaut wird so kurz vor sein Ende.
Dor Tach mit’s Schlachten rickte immer näher. Es war nu Dezembor un och mächtich kolt, lausich kolt ähm.
Jetzt ware nu endlich da, dor Todestach von’s Schwein.
In alle Friehe mussten de Sausewinds uffschtehn, denn dor Tach schien lank zu wern. Bei’s Schlachten musste jeder ran, denn Arweet jab’s vor alle jenuch. Da musste schon frie dor Kessel ins Waschhaus anjeheezt wern. Vill heeßes Wasser braucht mor bei’s Schlachten, vor’s Schweinebrien, de Derme reenewaschen unn Fleesch unn Wurscht mussten ja och noch jekocht wern.
Es war noch richtich dunkel offen Hoff unn mächtich jefrorn hottes noch ma in de Nacht.
Nu hotte sich de janze Famielije Sausewind vor de Schtalltiere injefunn um Abschied zu nähm von de jeliebte Sau, weil dor Fleescher nu baale anrikte. Alle wollten se Jonas noch ma läwendich sähn, keener dachte jetzt an Fleesch unn Wurscht, se warn eenfach traurich wäjen’s Tier unn de Kinner weenten.
Awwer wäjen de janze Uffräjunk hotte doch keener an de Schweinediebschtals- vorsicherungsanlaare jedacht unn bei’s Uffmachen funkjonierte die janz wie jewollt unn och janz parfekt.
De Jelocke schprank an unn bimmelte janz laut unn och dor Hund bellte dorzu. Vater hotte 6 Liter offn Balch, Mutter den Rest, 4 Liter. De Kinner schtann dorhinner, bliem trocken unn kunnten schonn willer lachen iwwer de bejossennen Pudel vorn Schweineschtall.
De beeden ollen Sausewinds mussten willer rin in de Stuwwe, sich umzien.
Da kahm dor Fleescher och noch dorzu unn lachte mächtich iwwer’s Mißjeschick von de Sausewinds, lächte sein janzes Warkzeich in de Waschkiche ab, kukte ob alles da war, ob de Molln ausjescheiert sinn, ob dor Fleeschwolf richtich reene iss unn dor Kessel anjeheetzt iss.
Wichtich war och, dass de Letter feste an de Bonntiere anjebunn is, wäjen’s Schwein anhängn. Dor Abloof musste jenau bis off’s kleenste stimm, bei’s Schlachten.
Jetzt sollte nu de Sau raus aussen Schtall. Se streibte sich, hotte woll ferchterliche Angest vorn Fleescher. Irjentwann jab se denn doch off, wäjen de Jewalt.
Es wurre schon ann bisschen helle draußen. Sausewinds mußten’s Tier mit zwee Schtricke ann Berrnboom anläjen unn festehaaln. Dor Fleescher wollte’s nu mittn jeroßen Holzhammer vor’s Abschtechen beteim. Er holte jewaltich aus mit’n Hammer unn schluk zu.
De Sau markte des, zuckte vorher zusamm unn dor Fleescher rutschte off’s jefrorne Wasser von de Schweinediebschtalszusatzvorsicherung aus unn dor jeroße Holzhammer traf jenau sein Daum. Das Schwein kwikte ferchterlich, dor Fleescher ann bisschen leiser. Dor Fleescher holte nochma aus. Nan zweeten Schlach war’se denn och beteibt de Sau unn wurre abjeschtochen. Das Blut wurre inne Schissel offjefangn unn jeriert von Frau Sausewind for de Rotwurscht. Als nas Brien unn Ausnähm das Tier endlich off de Letter hink, wurre erscht ma vor alle ann Schnaps innjeschenkt, das war ja frieher so iblich bei’s Schlachten.